इतिहास म्हणजे केवळ भूतकाळातील घटनाक्रम नसून, तो एक प्रेरणादायी आणि भविष्यातील वाटचालीचा ‘दीपस्तंभ’ आहे. तोच इतिहास जर खोटा आणि विकृत करून समाजमनावर बिंबवला गेला, तर राष्ट्र आणि धर्म यांची कधीही भरून न येणारी हानी होऊ शकते. भारतात ब्रिटिशांच्या काळापासून हिंदूंची भावी पिढी नपुंसक आणि चारित्र्यहीन व्हावी, याची पद्धतशीर योजना राबवली जात आहे. त्यासाठी प्रामुख्याने शिक्षणक्षेत्राला केंद्रित करण्यात आले आहे. शालेय पाठ्यपुस्तकांद्वारे हेतूपुरस्सर विकृत इतिहास शिकवला जात आहे. हिंदू जनजागृती समिती समविचारी संघटनांच्या साहाय्याने या इतिहासाच्या विकृतीकरणाच्या विरोधात सातत्याने लढा देत आहे.
इतिहास म्हणजे प्रत्यक्ष वास्तव. इतिहास हा इतिहासच असतो. या इतिहासाचे सादरीकरण जसेच्या तसे करणेच आवश्यक असते. इतिहासाला पालटण्याचा प्रयत्न केल्यास ती एक विकृतीच बनते. कलेच्या नावाखाली तुम्ही इतिहासाचे भांडवल बनवायचा प्रयत्न कराल, तर तुम्हाला समाजविरोधाला नक्कीच सामोरे जावे लागते.
शालेय पाठ्यपुस्तकांचा अभ्यासक्रम बनवणार्‍या एन्.सी.ई.आर्.टी. यांसारख्या काही संस्था, विद्यालये आणि विविध राज्यांतील शिक्षण मंडळे हिंदुविरोधी अन् विकृत इतिहास सादर करतात. हिंदूंचा स्वाभिमान जागृत होऊ नये, यासाठी भारताला सर्वांगाने लुबाडणार्‍या धर्मांध आक्रमकांचा उदोउदो, क्रांतीकारकांचा अवमान आणि भारताला घडवणार्‍या छत्रपती शिवरायांसारख्या राजांना नगण्य स्थान, असे या सर्व विकृतीकारांचे धोरण आहे.