आश्विन शुद्ध प्रतिपदेला नवरात्र उत्सव सुरू होतो. नवरात्र आदिशक्तीच्या आराधनेचा उत्सव आहे. आपण सर्व आनंदी आणि आदर्श जीवन जगू, यासाठीच ईश्वराने उत्सवांची निर्मिती केली आहे; पण सध्या सण-उत्सवांकडे फक्त मौज-मजा म्हणून पाहिले जात आहे. तसेच त्यात गैरप्रकारही वाढले आहे. देवीतत्त्व प्रदान करणाऱ्या या उत्सवांत सध्या सुरू असलेल्या विकृतींमुळे पवित्रता नष्ट होत चालली आहे. नवरात्र उत्सव म्हणजे आपल्यातील दुर्गादेवीची शक्ती जागृत करणे. सध्याच्या अनेक महिला दुर्बल झाल्याने त्यांची प्रतिकार करण्याची क्षमता कमी आहे, म्हणूनच महिलांवर होणारे अत्याचार वाढले आहेत. राणी लक्ष्मीबाईंनी इंग्रजांविरुद्ध लढा दिला. आपल्यालाही भक्तीद्वारे आपल्यातील देवीतत्त्वाला जागृत करुन, स्वतःची तसेच राष्ट्र आणि धर्माचे रक्षण करायला सिद्ध व्हायला हवे. चला, या उत्सवात होणाऱ्या गैरप्रकारांना थांबवून, त्याची पवित्रता जपून ठेवण्याचा संकल्प करूया आणि देवीची कृपा संपादन करूया!