संत निळोबांचे अभंग : २

ॐनमोजि विश्वतीता । विश्वव्यापका श्रीअनंता ।
परात्परा सद्‍गुरुनाथा । ईश्‍वरनियंता सकळादी ॥१॥

तुमचा अनुग्रहो झालिया । निरसे मोह ममता माया ।
करुनी उपदेशी ब्रह्मया । निजात्मपदीं स्थापिसी ॥२॥

सनकादिकांचें चिंतन । नाम तुमचें अनुसंधान ।
त्यातें स्वरूप स्थिति पाव‍उन । ठेविसी निमग्न निजानंदीं ॥३॥

शुक प्रल्हाद नारद । पावोनियां तुमचा बोध ।
कारिता सदा ब्रह्मानंद । तारिती कीर्तनें आणिकां ॥४॥

निळाह्यणे परमानंदा । परात्परा सच्चिदानंदा ।
सद्‌गुरुराया निजात्माबोधा । कृपेस्तव लाहीज तुमचिये ॥५॥