उज्जैन – केंद्र सरकारने गायीला राष्ट्रमातेचा दर्जा द्यावा आणि देशात गोमंत्रालयाची निर्मिती करावी, याकरता उत्तराखंडचे संत गोपाल ‘मणि’ महाराज यांनी ९ मे पासून देशभरात ‘गो प्रतिष्ठा’ यात्रा चालू केली आहे. ही यात्रा १६ डिसेंबरला उज्जैन येथे आली असता चिमनगंज मंडी पटांगणात झालेल्या मार्गदर्शनात त्यांनी लोकांना गोरक्षणासाठी आवाहन केले. या वेळी हिंदु जनजागृती समितीचे श्री. योगेश व्हनमारे यांनी राष्ट्र आणि धर्म यांच्या कार्यासाठी महाराजांचे आशीर्वाद घेतले. आतापर्यंत या यात्रेने ७ राज्यांतून भ्रमण केले असून ती ८ वे राज्य मध्यप्रदेशमध्ये फिरत आहे.
देशभरातील ६७६ जिल्ह्यांतून गोमातेचा प्रचार केल्यावर १८ फेब्रुवारी २०१८ या दिवशी देहलीमध्ये या यात्रेचा समारोप होणार आहे. त्यानिमित्ताने देशातील १ कोटी लोकांच्या समर्थनासह गोकुंभाचे आयोजन करण्यात आले आहे. या वेळी केंद्र सरकारला गोरक्षणाशी संबंधित मागण्यांचे निवेदन देण्यात येणार आहे.
