ब्रिटनमध्ये राहायचंय, इंग्रजी आलंच पाहिजे : डेव्हिड कॅमेरून

विवाहानंतर ब्रिटनमध्ये आलेल्या महिलांमधील अनेकांना येथील इंग्रजी ही राष्ट्रभाषा बोलता येत नसल्याने हा निर्णय घेण्यात आला आहे. परीक्षेत नापास होणाऱ्या महिलांना पुन्हा त्यांच्या मूळ देशी परत पाठविण्यात येणार असल्याची माहितीही देण्यात आली. ज्यांची मुले येथे जन्माला आली अशा महिलांचे काय, त्यांनाही देशाबाहेर काढणार का, असा प्रश्‍न कॅमेरून यांना विचारला असता त्यांनी असे लोक ब्रिटनमध्ये राहू शकतील की नाही याबाबत खात्री नसल्याचे सांगितले. बीबीसी रेडिओला दिलेल्या मुलाखतीत ते बोलत होते.

तुम्ही भाषा सुधारण्यासाठी इथे राहू शकता; परंतु त्याचीही खात्री कशी देणार? विचारांती ही थोडी अवघड गोष्ट असली तरी इथे येणारे लोकच याला जबाबदार असल्याचे कॅमेरून म्हणाले. ब्रिटनमध्ये जन्माला आलेल्या आणि एकच पालक असलेल्या मुलांना ब्रिटिश नागरिकत्व दिले जाते, त्यामुळे अशी मुले येथे राहू शकतात; परंतु त्यांच्या मातांना इंग्रजी भाषा येत नसेल तर इथे राहता येणार नाही; परंतु असे नागरिकत्व मिळालेल्या मुलांना त्यांच्या आईसोबत आईच्या मूळ गावीही राहायला जाता येणार नाही, अशी शक्‍यता व्यक्त होत आहे.

विशेषत: स्थलांतरितांमधील महिलांनी इंग्रजी भाषेचे शिक्षण घेण्यासाठी धोरण आखत असलेल्या कॅमेरून सरकारने काही वर्षांपूर्वी स्थलांतरितांसाठीच्या इंग्रजी भाषेच्या अभ्यासक्रमासाठीच्या निधीत कपात केली होती. अर्थव्यवस्था तुटीमध्ये असल्याने अशा स्वरूपाचा निधी कपात करण्याचा निर्णय घ्यावा लागला, अशी कबुलीही पंतप्रधान कॅमेरॉन यांनी या वेळी दिली.