सुप्रसिद्ध मल्ल्याळम् चित्रपट निर्माते अली अकबर बनले ‘राम सिम्हन’ !

नवी देहली – सुप्रसिद्ध मल्ल्याळम् चित्रपट निर्माते अली अकबर यांनी १३ जानेवारी या दिवशी विधीवत् स्वरूपात हिंदु धर्म स्वीकारला. या वेळी त्यांच्यासमवेत त्यांची पत्नी लुसिम्मा याही उपस्थित होत्या. या शुद्धीकरण विधीनंतर अली अकबर हे ‘राम सिम्हन’ या नावाचे ओळखले जातील. तिन्ही संरक्षण दलांचे प्रमुख जनरल बिपीन रावत यांच्या दुर्दैवी मृत्यूनंतर इस्लामी कट्टरतावाद्यांनी विविध सामाजिक माध्यमांवर आनंद  व्यक्त केला होता. त्यामुळे व्यथित झालेले अली अकबर यांनी गेल्या डिसेंबरमध्ये इस्लाम सोडून हिंदु धर्म स्वीकारत असल्याची घोषणा केली होती.

अली अकबर आणि लुसिम्मा यांची काही छायाचित्रे सामाजिक माध्यमांत प्रसारित झाली आहेत. त्यात एका शुद्धीकरण समारंभामध्ये दोघेही हवनकुंडाजवळ बसून आहुती देत असल्याचे दिसत आहे. या वेळी अली अकबर यांनी सात्त्विक पोशाखामध्ये खांद्यावर भगवे वस्त्र आणि जानवे धारण केले होते.