|
चेन्नई (तमिळनाडू) – हिंदूंच्या देवतांची खिल्ली उडवणे, संतापजनक टिपण्या देणे, हा भारतीय दंड संहितेनुसार फौजदारी गुन्हा आहे, असे मद्रास उच्च न्यायालयाने म्हटले आहे. गेल्या वर्षी जुलैमध्ये कन्याकुमारी पोलिसांनी हिंदूंच्या धार्मिक भावना दुखावल्याच्या प्रकरणी पाद्री जॉर्ज पोन्नैया यांच्याविरोधात गुन्हा नोंदवला होता. त्याला पोन्नैया यांनी मद्रास उच्च न्यायालयात आव्हान दिले होते. त्यावर न्यायालयाने वरील मत व्यक्त करत ही याचिका फेटाळून लावली.
न्यायालयाने म्हटले, ‘पोन्नैया यांनी भारतमाता आणि भूमीदेवी यांच्या विरोधात निंदनीय टिपणी केली आहे. हे हिंदूंच्या भावना दुखावण्यासारखे आहे; कारण हिंदु संकल्पनेनुसार दोघेही देव आहेत. त्यामुळे ही टिपणी भारतीय दंड विधानाच्या अंतर्गत गुन्हा ठरते. गुन्हा नोंदवणार्‍या पोलिसांना दोष देता येणार नाही.’
