कुशीनगर (उत्तरप्रदेश) येथे ‘द कश्मीर फाइल्स’ पाहून घरी परतणार्‍या ३ हिंदु तरुणांवर धर्मांधांकडून आक्रमण : प्रकृती चिंताजनक

कुशीनगर (उत्तरप्रदेश) – कुशीनगर जिल्ह्यातील फाजिलनगर शहरात १९ मार्चच्या रात्री ९.३० वाजण्याच्या सुमारास ‘द कश्मीर फाइल्स’ हा काश्मिरी हिंदूंच्या वंशविच्छेदावर आधारित चित्रपट पाहून घरी जाणार्‍या ३ हिंदु तरुणांवर ५ धर्मांध तरुणांनी चाकूद्वारे आक्रमण केले. त्यामुळे हे तीनही तरुण गंभीररित्या घायाळ झाले. उपचारांसाठी त्यांना जवळच्या प्राथमिक आरोग्य केंद्रात भरती करण्यात आले. तेथून त्यांना वैद्यकीय महाविद्यालयाच्या रुग्णालयात पाठवण्यात आले.

सचिन गोंड (वय १८ वर्षे), कृष्णा जैस्वाल (वय १७ वर्षे) आणि साहुल जैस्वाल (वय १८ वर्षे) अशी या तिघांची नावे आहेत. धर्मांधांनी त्यांच्या मानेवर, पाठीवर आणि पोटावर चाकूने वार केले आणि पळ काढला. पाथेरवा पोलीस ठाण्याचे प्रमुख अखिलेश कुमार सिंह यांनी घटनास्थळी धाव घेतली. ‘आरोपी लवकरच पोलिसांच्या हाती लागतील’, असे त्यांनी सांगितले.