मुंबई – ‘मलबार गोल्ड’च्या विज्ञापनाच्या विरोधात #Boycott_MalabarGold आणि #No_Bindi_No_Business या नावांनी ट्विटरद्वारे हॅशटॅग ट्रेंड करण्यात आला. या ट्रेंड्सच्या माध्यमातून धर्मप्रेमी हिंदूंनी ‘मलबार गोल्ड’चा निषेध करत त्यावर बहिष्कार टाकण्याचे हिंदूंना आवाहन केले. या ट्रेंडला व्यापक पाठिंबा मिळून दोन्ही हॅशटॅग राष्ट्रीय स्तरावर अनुक्रमे ५ व्या आणि ६ व्या स्थानांवर होते. या विषयावर २५ सहस्रांहून अधिक ट्वीट्स करण्यात आल्या.
मोठ्या प्रमाणात प्रसारित झालेल्या काही लक्षवेधी ट्वीट्स !
१. ‘मलबार गोल्ड’ आस्थापनाने हे लक्षात ठेवावे की, अक्षय्य तृतीया हा हिंदूंचा सण आहे. त्याने रमझानसारखा त्याचा प्रचार करू नये !’ – श्री. रमेश शिंदे, राष्ट्रीय प्रवक्ते, हिंदु जनजागृती समिती
२. ‘मलबार गोल्ड’चे हे विज्ञापन हिंदूंच्या सणांचा अवमान करणारे आहे. कुंकू लावणे हा पारंपरिक हिंदु वेशभूषेतील महत्त्वपूर्ण भाग आहे. हिंदूंच्या परंपरांचे हसे करणार्‍यांवर हिंदूंनी त्यांचे पैसे खर्च करावेत ? हे कदापि होऊ शकत नाही !’ – अपर्णा नाईक, हिंदुत्वनिष्ठ
३. ‘हिंदूंच्या परंपरांचा आदर करणार्‍यांच्या समवेतच आपण व्यवहार करण्याचा निश्‍चय करूयात !’ – ‘हिंदु जनजागृती समिती’चे अधिकृत ट्विटर खाते
Hindus protest against ‘Malabar Gold’s advt. for Akshay Tritiya showing Kareena Kapoor Khan without bindi
Lets pledge to give our business only to those who respect Hindu customs during Hindu festivals.#No_Bindi_No_Business #Boycott_MalabarGold pic.twitter.com/tV1xvnRR7r
— HinduJagrutiOrg (@HinduJagrutiOrg) April 22, 2022
४. ‘हिंदूंसाठी कुंकवाला एका लाल ठिपक्याहूनही पुष्कळ अधिक महत्त्व आहे. जर ‘मलबार गोल्ड’सारखी आस्थापने हे समजू शकत नसतील किंवा मुद्दामहून त्याकडे दुर्लक्ष करत असतील, तर हिंदूंनी त्यांना घरचा रस्ता दाखवण्याची हीच वेळ आहे !’ – ‘सनातन प्रभात कन्नड’चे अधिकृत ट्विटर खाते
‘मलबार गोल्ड’च्या अक्षय्य तृतीयेच्या विज्ञापनाला हिंदूंचा विरोध !
एम.पी. अहमद यांच्या मालकीचे ‘मलबार गोल्ड अँड डायमंड्स’ या सोने आणि हिरे यांच्या दागिन्यांची विक्री करणार्‍या आस्थापनेने अक्षय्य तृतीयेच्या प्रीत्यर्थ दागिन्यांचे विज्ञापन प्रसारित केले आहे. या विज्ञापनात अभिनेत्री करिना कपूर खान यांना दागिने घालून दाखवण्यात आहे; मात्र त्यांच्या कपाळावर बिंदी नाही. हिंदूंच्या सणासाठी दागिन्यांचे विज्ञापन करतांना अभिनेत्रीने बिंदी न लावल्याने ‘मलबार गोल्ड’च्या अक्षय्य विज्ञापनाला हिंदूंनी विरोध केला आहे. (‘मुसलमानांच्या मालकीच्या आस्थापनेने ईदच्या काळात विज्ञापन प्रसारित करतांना मुसलमानांच्या पेहरावाचा नक्कीच विचार केला असता; मात्र हिंदूंच्या सणांच्या काळात विज्ञापन प्रसारित करतांना हिंदूंच्या पेहरावाचा आणि त्यांच्या संस्कृतीचा विचार का केला जात नाही ?’, याचा जाब या आस्थापनेला हिंदूंनी विचारला पाहिजे ! – संपादक दैनिक सनातन प्रभात)
बहुतांश हिंदु स्त्रिया कपाळावर कुंकू किंवा बिंदी लावतात. हिंदूंच्या सणांच्या दिवशी तर त्याला विशेष महत्त्व असते; मात्र ‘मलबार गोल्ड अँड डायमंड्स’ या आस्थापनेने तिच्या विज्ञापनात अभिनेत्री करिना कपूर खान यांना बिंदीशिवाय दाखवून हिंदूंच्या परंपरेला छेद देण्याचा प्रयत्न केला आहे. हा हिंदु धर्माचा अवमान आहे. त्यामुळे सामाजिक माध्यमांद्वारे अनेक धर्मप्रेमी हिंदूंनी ‘मलबार गोल्ड’वर टीकेची झोड उठवली आहे.
