शेख जीना पत्रकार परिषदेत ‘पी.एफ्.आय.’च्या अस्तित्वाविषयी प्रश्‍नचिन्ह उपस्थित करतांना म्हणाले, ‘‘राष्ट्रीय हज समितीचा अध्यक्ष असतांना मी देशभर दौरे केले; परंतु मला ‘पी.एफ्.आय.’चे अस्तित्व कुठेच जाणवले नाही. ‘पी.एफ्.आय.’ची स्थापना केरळमध्ये झाल्याचे त्यांचे सदस्य सांगतात; परंतु कोची आणि अन्य शहरांमध्ये त्यांचा वावर दिसत नाही.’’
(सौजन्य : Prudent Media Goa)
शेख जीना यांनी, ‘कर्नाटक आणि केरळ सीमेवर एका गावात ‘पी.एफ्.आय.’ची स्थापना झाली असावी’, असे सांगून ‘पी.एफ्.आय.’ची खिल्ली उडवली. शेख जीना पुढे म्हणाले, ‘‘पी.एफ्.आय.’ गोव्यात काही उपक्रम राबवत असल्याचे दिसते; मात्र ‘पी.एफ्.आय.’ हा काँग्रेसचा ‘ब’ गट आहे. काँग्रेस पक्ष आता संपत आला असून, ‘पी.एफ्.आय.’ ने काँग्रेसमध्ये विलीन होणेच योग्य आहे. ‘पी.एफ्.आय.’ स्वत: कोणतीही निवडणूक लढवत नाही. प्रथम त्यांनी त्यांचा एक पंचसदस्य निवडून आणावा. गोव्यात सर्वधर्मीय एकोप्याने रहात असल्याने येथे कुणीही एकमेकांमध्ये धार्मिक भेद निर्माण करण्याचा प्रयत्न करू नये. भाजपच्या काळात राज्यात मुसलमानांचा उत्कर्ष झालेला आहे. ‘पी.एफ्.आय.’ ही मुसलमानधार्जिणी संघटना असून लोकशाहीत अशा संघटनेला थारा नाही.’’
