रामनाथी (गोवा) : काशी विश्‍वनाथ मंदिर अतिक्रमणमुक्त होण्यासाठी ज्ञानवापी मशिदीच्या विरोधात न्यायालयीन लढा देत असलेले ‘हिंदु फ्रंट फॉर जस्टिस’चे प्रवक्ते तथा सर्वोच्च न्यायालयातील अधिवक्ता विष्णु शंकर जैन, वाराणसी येथील अधिवक्ता मदन मोहन यादव, गोवा येथील ‘भारत माता की जय’ संघाचे संघचालक प्रा. सुभाष वेलिंगकर आणि हिंदु जनजागृती समितीचे श्री. सत्यविजय नाईक यांनी १४ जून या दिवशी सकाळी शंखवाळी (सांकवाळ) येथील ‘फ्रंटीस पीस ऑफ सांकवाळ’ हे वारसा स्थळ (पुरातन श्री विजयादुर्गा मंदिराची भूमी) आणि फोंडा येथील साफा मशीद यांना भेट दिली.
चर्च संस्था शासकीय अधिकार्‍यांवर दबाव आणून गेल्या काही वर्षांपासून ‘फ्रंटीस पीस ऑफ सांकवाळ’ हे वारसा स्थळ कह्यात घेण्यासाठी विविध गैरकृत्ये करत आहे.
या पार्श्‍वभूमीवर भेट दिलेल्या मान्यवरांनी या परिसराचे निरीक्षण केले, तसेच फोंडा येथील साफा मशीद परिसरातील तळे आणि वडाचे झाड यांचीही मान्यवरांनी पहाणी केली.
