गदापूजनाने होणारी शौर्यजागृती हिंदूंमध्ये रामराज्याच्या संघर्षासाठी आवश्यक ती ऊर्जा निर्माण करील ! -संपादक
मुंबई – हनुमान जयंतीच्या निमित्ताने ‘गदापूजना’च्या माध्यमातून हिंदूंमधील शौर्य जागृत व्हावे आणि रामराज्याच्या कार्यासाठी आध्यात्मिक बळ मिळावे, या उद्देशाने हिंदु जनजागृती समिती आणि समविचारी हिंदुत्वनिष्ठ संघटना यांच्या सहभागाने मुंबई आणि पालघर येथे २० ठिकाणी सामूहिक ‘गदापूजन’ करण्यात आले.
मुंबईमध्ये प्रभादेवी, वरळी, माहीम, भांडुप, कांजूरमार्ग, घाटकोपर, विक्रोळी, कुर्ला, जोगेश्वरी, गोरेगाव, नवी मुंबईत खारघर, तर पालघर जिल्ह्यात डहाणू आणि नालासोपारा येथील विविध मंदिरांत ‘गदापूजन’ करण्यात आले. सामूहिक प्रार्थना, ‘गदापूजन’ विधी, श्री हनुमानाची आरती, मारुतिस्तोत्र, ‘श्री हनुमते नम:।’ हा सामूहिक नामजप, ‘धर्मसंस्थापनेसाठी मारुतिरायांचे गुण कसे आत्मसात करावेत ?’ याविषयीचे मार्गदर्शन या वेळी झाले. कार्यक्रमाच्या शेवटी ‘रामराज्याच्या स्थापनेसाठी सामूहिक प्रतिज्ञा’ घेण्यात आली.
