आयएसआयएस ची बीजे भारतात किती खोलवर रुतली आहेत याचा आणखीन एक दाखला
नवी देहली : जगाला हादरवून टाकणाऱ्या ‘आयएसआयएस’ या रक्तपिपासू दहशतवादी संघटनेचा झेंडा व लोगो बनविल्याप्रकरणी राष्ट्रीय तपास संस्थेने (एनआयए) चेन्नईच्या मोहम्मद नासेर याच्यावर आरोपपत्र दाखल केले आहे. हे आरोपपत्र आता न्यायालयापुढे सादर केले जाणार असून नासेरच्या वडिलांनाच मुख्य साक्षीदार म्हणून हजर केले जाण्याची शक्यता आहे.
नासेर हा इंजिनिअरिंग केलेला २३ वर्षाचा चेन्नईचा तरुण दुबईत एका कंपनीत वेब डेव्हलपर म्हणून दरमहा २५०० दिऱ्हाम (दुबईचे चलन) या पगारावर नोकरी करत असताना त्याचा ‘आयएस’ या दहशतवादी संघटनेशी संपर्क झाला. सोशल नेटवर्क आणि मेल, व्हॉट्सअॅपवरून आलेले व्हिडिओ बघून आणि ‘आयएस’च्या माणसांच्या संपर्कात राहून त्याचे विचार बदलले. जयपूरमध्ये इंडियन ऑइल कंपनीत मॅनेजर पदावर असलेल्या मोहम्मद सिराजुद्दीनच्या तो नियमित संपर्कात होता. पुढे दोघांनी कायमचे सिरियात जाण्याचा निर्णय घेतला. नासेरने कंपनी व्यवस्थापनाच्या ताब्यात असलेला त्याचा पासपोर्ट चोरला आणि कंपनीला कोणतीही माहिती न देता सिरियाला जाण्याचा निर्णय घेतला. मात्र, जाण्याआधी त्याने वडील अमीर मोहम्मद यांना एक मेल केला होता. हा इ-मेल वाचून काळजीत पडलेल्या नासेरच्या वडिलांनी थेट दुबई गाठून नासेरला रोखण्याचा निर्णय घेतला. मात्र ते दुबईत पोहोचण्याआधीच नासेरने कंपनी सोडली आणि सुदान गाठले. तिथून पुढे सिरियात दहशतवादी कारवाया करण्यासाठी जाण्याची त्याची योजना होती. मात्र पुढील प्रवास सुरू करण्याआधीच तो पकडला गेला.
मागच्या वर्षी डिसेंबर (२०१५) महिन्यात नासेरला भारतात आणण्यात आले. ‘एनआयए’ने सखोल चौकशीअंती नासेरविरोधात आरोपपत्र दाखल केले आहे. नासेरचे वडील अमीर मोहम्मद यांनी मुलाच्या काळजीपोटी थेट दुबई गाठून नासेरची माहिती मिळवण्याचा प्रयत्न केला होता. तिथे असतानाच त्यांना नासेर दहशतवाद्यांच्या गटात सहभागी होण्यासाठी सिरियाला जाण्याच्या तयारीत असल्याचे कळले. सगळा प्रकार समजल्यावर त्यांनीच नासेरविरोधात ‘एनआयए’ला सर्व माहिती दिली.
अमीर मोहम्मद यांची साक्ष भादंविच्या १६४ कलमाअंतर्गत नोंदवण्यात आली आहे. नासेरचा खटला आता एनआयएच्या विशेष न्यायालयाकडे वर्ग करण्यात आला आहे. तिथेच या खटल्याची सुनावणी होईल.
सुदानमध्ये असताना घरच्यांपासून कायमचे दूर जायचे या विचाराने भावुक झालेल्या नासेरने वडिलांना एक ई-मेल करून आईची काळजी घेण्यास सांगितले होते. या मेलमध्ये आपण पवित्र कामासाठी सिरियाला जात असल्याचे नासेरने नमूद केले होते. या मेल व्यतिरिक्त नासेर आणि त्याच्या वडिलांमध्ये व्हॉट्सअॅपवरूनही चर्चा झाली. हा डिजिटल पुरावा एनआयए न्यायालयापुढे सादर करणार आहे. डिजिटल पुराव्यासोबतच नासेरविरोधात त्याच्या वडिलांनी दिलेली माहिती न्यायालयात सादर केली जाईल. नासेर प्रकरणाची पहिली सुनावणी ९ जून रोजी होणार आहे. याच दिवशी आरोपपत्र न्यायालयात दाखल केले जाईल. एनआयए सिराजुद्दीन विरोधातही एक स्वतंत्र आरोपपत्र दाखल करणार आहे.
संदर्भ : महाराष्ट्र टाइम्स
